Photo Source : http://shumanchopin.blog.163.com/
自從新書《特首開工喇》出版之後，有朋友碰面時會叫我做作家，但實在真有D唔好意思同非常唔習慣呢，真係唔敢當。我仲係喜歡大家叫我做阿水好喇。
其實我同好多朋友一樣，都係一個普普通通生活喺香港既小市民。星期一至五每日如常咁返工，如常咁OT，每日食差唔多既早餐、午餐同晚餐。有兩個仔女，同其他小朋友一樣，有可愛既時候，亦都有頑皮既時候。週末一般都係家庭聚會又或者同朋友聚下舊食餐飯，互相講下大家既近況。每個星期大概都係如是咁樣過去。
一切雖然刻板但總算安穩，係好應該感恩既。呢幾年，社會上有越來越多比我地冇咁幸運，生活欠缺安穩既人，但係我地又有冇諗過自己其實又可以安穩多幾多年呢？
平時我地可能好少停低落黎，細心去睇下我地呢個城市其實變左幾多：
以前既戲院可能已經變成左名店，幫襯開既茶餐廳變左做金舖，梗有一間喺左近既除左係便利店仲有葯房。
行人路濶左，公共空間多左，但同時規距亦都多左，保安嚴密左，行人路上又可唔可以好似以前一樣咁自由呢？
幼稚園入學面試既人龍一年比一年長，你以為經派位入讀既中小學唔知邊一年起已經轉左做直資，A level唔再叫A level而係叫中學文憑試，考既人唔再只係幾萬人，而係七萬幾人。
大學雖然大左，但係學生可以自由留連既地方可能仲少左添，而且可以容納既聲音亦都少左。
公立醫院既急症室除左要處理危機同急症、照顧濫用急症室服務既病人，仲要隨時變身產房為內地孕婦接生。
商場越起越多，越來越靚，但選擇卻越來越少；商業大厦越起越高，不過成功既企業又有幾多間呢？
交通網絡越來越發達，但唔見得可以路路暢通。
一間鐵路公司最賺錢既業務唔再係鐵路而係地產項目。
私人樓盤遍地開花，但好多樓盤既名我地已經唔識讀；68樓上一層原來已經係88樓；平台亦即係地下。
我地講保育多左，但有歷史價值、集體回憶既古蹟同空氣清新既郊區就越來越少；海港既海水比以前乾淨左，但係個海港又剩返幾多呢？
我地更加注重環保，膠袋既數目的確係減少左，但係同時我地製造左更多既浪費；馬路邊既廢氣少左，但媒體上、政圈內既風氣就變得越來越混濁。
15年黎，煙花一年比一年燦爛，民生卻一年比一年糜爛。
究竟呢D叫做發展定係倒退呢？
希望大家喜歡以下呢首歌，係Shine既燕尾蝶，特別希望大家聽歌之餘都可以引起一D反思吖。
