好一份2011/12財政預算案！特衰政府豪派四五百億都居然仲可以俾人剷到上天花板，難度其實相當高！
當中動用240億向每人強積金(又有人稱強迫金)戶口注資六千大元之舉，更成功辣著好多香港人，包括香港政府一直引以為傲的公務員，分分鐘當中有幾位仲係呢份預算案既寫手添。
此政策由頭到尾都荒謬得沒有一瓣站得住腳，係比屎坑更屎既「橋」，再加上財爺唔經大腦唔清唔楚的演澤，自然成功點火囉！
先天不足，政府從來不察覺其實強積金由始至初都是一個沒有廣泛認受性之計劃，僱主想盡辦法逃避，僱員寧願供少D，要儲錢要投資為將來，為何要政府強迫要基金佬代勞？！仲有一世勞轆幾十年最後儲儲埋埋得果幾十萬，都唔知夠睇幾多次醫生囉！而家你仲入六千蚊入去？！三百幾萬個打工仔有幾多個like先？！
政策定位自相茅盾，最先話係舒困措施之一，你係派左六千蚊俾我，不過又唔俾我用，咁有幾舒困先？！劃一入六千，打工皇帝同百萬高薪人仕有冇困要舒先？！不如派俾少D人，將幾億好幾十億又好去支援一下真正有需要階層或者一D有利香港長遠發展既產業/政策/人材等等。
OK…你改口風話係幫我地投資將來，咁係咪賺硬先？！蝕左咁點？！OK…當我地65歲時六千變左六萬好未，但係到時可能六萬蚊只係夠租格籠屋一個月囉！將來既野全世界既人(包括財爺)冇人知，但有一點泥民百姓如我就非常肯定，就係D基金佬可以穩袋當中幾億既管理費！可能政策真係為左投資將來，不過係財爺既將來囉！
「如果直接退稅會剌激消費引發通賬…」呢條Line-to-take亦係超錯！問你如果現兜兜派240億出黎會剌激通漲升幾多%，你又答唔出！(不過理論上其實應該計到？) 另外照財爺所講就好像只有呢240億會剌激消費，難道佢assume左收左雙糧既綜援戶傷殘人仕老人家會儲埋筆雙糧唔駛當冇收過？！再者，財爺自己都可能唔記得，2008年正值金融海嘯之際，政府否決派發消費券既原因就係認為現兜兜未必能剌激消費振興經濟。咁點解而家又打倒2008年既自己呢？！
Presentation亦見拙劣，logic唔喺度，detail欠奉，包D乜人唔包D乜人自己都搞唔清楚就企出黎講，冇得唔衰囉！
歸根究底，第一、衰冇心！AO的、當官的從來唔了解社會點運作，一個從來唔知/唔需要知乜野係粟米班塊飯既人當然唔知粟米班塊飯賣幾錢喇！目標亦唔清晰，根本冇諗過真係去address問題既核心，只求財散人安樂！
第二、衰假諮詢！OK…你唔熟悉民情，咁你問人囉，但其實你心入面已經有晒打算，不過唯世所迫要做諮詢拍廣告，結果普羅市民真係又留鬚又留意見，搞到個個high晒之後其實冇既，咁咪憤怒鳥囉！(不過都係奉勸各位市民，唔好太相信所有政府事前做既諮詢，99%係門面野，其實佢地心入面已經有晒腹稿；而可悲既係政府真係會聽取市民意見既時候，通常都係死人冧樓又或者政策推出後有強烈反响既時候！)
第三、衰小人之心！政府永遠認為十個市民當中只少有一個會呃佢錢，所以一蚊都唔過你手唔蝕俾你 (近期交津就係一個經典例子)；相反，財團富商個個則促進經濟精忠報國！
第四、衰懶！份Budget其實只係改左年份同入面D霖把就差不多做完，所有措施政策都熟口熟面，每人六千入強積金呢條稿根本就係上次為低收入人仕每人強積金戶口注資四千蚊既加強版，夠環保又慳水慳力！一心亦諗住入落強積金可以省卻好多行政工作，乾手淨腳！
好喇好喇，批評夠了，還需替企得硬直的政府想出個下台階，拋幾個方案出來讓大家「較為」Happy。
前題係要死要面既政府完全跪低180度改變甚至放棄注資強積金呢個大理念既機會係近乎零，比較可行既係點樣幫市民套現攞返筆錢出黎？其中一個較為簡單既做法可以係政府代打工仔代供N個月強積金，上限為幾多錢。咁變相打工仔每個月頭多左少少錢駛，對所造成既通漲壓力亦較温和；不過當中仍然要考慮如何將公務員、ORSO Scheme同自僱人仕納入派錢範圍，發放特惠津貼？代供ORSO？另外亦需要重新考慮係唔係需要派錢俾交標準稅率既高薪人仕？！
又或者其實直接按收入多寡退稅更加係一個較公平、慳錢 (只需幾十億)、行政簡單既做法。咁當然someone could argue咁D N無人仕點呀？Sorry，因為呢類人仕都可以算係隱敝市民，政府確實好難摷到你地出黎俾張支票你，大家亦需要明白資源確實有限，nobody, no plan can please the whole world！小弟亦愚昧，真係冇橋！如果大家有，財爺會好想知。
在此都分享一段有趣既影片，精辟抵死：希特拉都頂唔順強積金！
後記：此文出街之日得悉財爺終於轉口風，承諾日內就注資強積金戶口、市民退稅以及對 N無人仕援助提出回應方案。好事黎既，大家拭目以待喇！
