「梁振英，求你放過香港啦！」

Photo Source : http://www.facebook.com/CEStartWorkLa

看罷CY到立法會的答問大會，雙方對答遊花園是意料之內。我們從來不是梁粉(亦非唐粉或民主派)，以前、現在和未來都不會是。但倒想表示認同CY言論中其中的「一小部分」。

CY希望他的僭建問題可以借此答問大會作個總結，好讓政府可以專注施政，解決一系列民生問題。對極，這個僭建風波擾嚷了這麼久，應該也是時候做個了斷。經過昨天的答問大會，議員和市民都應該心中有數，撐的相信會繼續盲撐死撐焗撐，不相信的也應該是哀莫大於心死，索性死心準備一月一日上街倒梁去。

...

另外也有一群希望息事寧人無奈接受的溫水青蛙，認為大家點解要「嘈喧巴閉搞咁多野」，不如由他run下去，旨意他以後生生性啦，我有我繼續搵食吃喝玩樂好了。

按觀察，抱有這個想法的人有不少。但其實他們沒有察覺當中的不妥。香港的確有很多刻不容緩的民生問題需要解決。本版比政府、比其他人更著緊民生問題，而只因我們認清了很多，所以我們比你們更感焦急。但觀乎新班子上任後爆鍋之頻密，今時今日不禁要問：繼續帶領香港的有必要是梁振英嗎？梁振英和他的團隊真的行嗎？

第一，梁先生說他上任後一車一車推出了很多利民措施。嗯，但只見大多章法紊亂，藥石亂投。例如他說重中之重的房屋政策方面。多得他的政策，連居屋都炒了上去；希望讓人置業的「置安心」賣五六千元一呎。其他政策亦有不少相確的地方，功効成疑。有說他上任才半年不夠，應該睇長遠一點，但實情是未見其利，已見其害。

第二，由組班到上任，他的團隊當中，除了林鄭，其他的大多乏善足陳，連番失誤，似負資產多過人才資產。一開始早已見組班困難，加上政府已現管治危機，就算CY會狠心撤換不得力的局長，相信也不會有真的人才願意加入，現有的唔跳船都偷笑。

第三，CY所犯的是誠信問題，而他的謊言和政策上的謬誤已離譜到連保皇黨也不敢盲撐，行政和立法的關係已經決裂，若果他繼續管治下去，也是會被人諸多質疑，舉步為艱，寸步難行。再者，可以想像一下，將來若果他的施政有嚴重失誤時，不能擔保他不會搬出「一時疏忽」、「唔記得」、「記錯左」之類的解釋喔。例如：我記憶中，我冇講過冇深港同城化，今次嘅割地賣港係我一時疏忽，為此我向受影响嘅香港市民致歉。嗱，講真，你覺得OK嗎？

所以要香港繼續向前行，與其長痛不如短痛，引刀一快換人，令香港可以重新出發！如今CY剩下最大的德政就只有自動落台。

CY教的德育課

多謝CY。今天我跟就讀小二的阿仔上了一堂德育課，亦讓我知道阿仔很乖很善良。

[嚴正聲明以下全是真實對話]

今朝如常送阿仔落樓搭校車，臨出門口…

阿仔睇到報紙寫住「大話特首」。佢好好奇咁問：「特首講大話呀？」

我：「係呀。」

仔：「吓，特首都講大話？佢講乜大話？」(一邊行一邊講…)

我：「嘩，好複雜架喎仔。嗱…咁…佢冇問過政府就將自己間屋加D房起大左，呢D叫僭建。如果人人都僭建，亂咁起屋將間屋加大，咁幢樓可能有危險架麻，同埋香港D樓咪亂晒龍。特首俾人知道左，但佢又同人講話唔記得問政府起唔起得...」

仔：「吓，佢負責管政府架麻，點會唔記得？即係佢冇問過政務司司長呀？」

我：「嗯…類似啦。咁佢話唔記得，算唔算講大話呢？」

仔：「算。」

我：「係囉，即係好似你做錯事，可唔可以同老師講唔記得吖？」

（呢句最精警！）琋：「唔可以。嘩，咁佢連自己間屋都管理得唔好，點管理香港呀？」

我：「係囉係囉，但係我想話俾你知，錯唔緊要，但千祈唔可以講大話，知唔知？」

仔：「知。」

亦適逢我知道昨日阿仔常識科有關「朋友」的一張工作紙上有條問題問：

如果你知道朋友做錯事，你應該怎樣做？

A) 勸他跟老師認錯

B) 替他隱瞞

於是我問：「仔，你揀乜野？」

琋：「叫佢同老師認錯囉。」

我：「但如果佢係你最好最好嘅朋友呢？」

琋：「唔得架，一定要話俾老師聽架，如果唔係，佢下次又會繼續錯囉。」

我：「嘩，阿仔，你真係乖啦。」

之後阿仔乘校車上學去，我感覺很安慰。

後記：CY嘅僭建風波，其實真相同道理就係咁簡單。連小朋友都認為特首講左大話，點解仲有大人會認為佢只係「一時疏忽」？退一萬步，就算佢真係一時疏忽，都係做錯事。錯唔緊要，但有錯就要認，呢個唔只係香港核心價值，更加係普世價值、做人嘅價值！